Os materiais de Fröbel

Fröbel nace en 1782 en Oberweissbach (Turinxia) e desenvolve diferentes oficios até que en 1805 comeza a traballar como educador nun centro educativo que emprega a metodoloxía pestalozziana e nese momento descobre a súa vocación de educador.
Ao ano seguinte vai ao centro que Pestalozzi dirixe en Iverdon e permanece alí catro anos coñecendo a súa metodoloxía de traballo.
En Keilhau crea un centro educativo que se manterá en funcionamento dende o ano 1817 até 1831.En 1836 foi nomeado director do orfanato de Burgdorf en Suíza e da súa escola elemental anexa, posto ao que ten que renunciar ao pouco tempo para marchar a Alemaña pola enfermidade da súa muller.
Todos estes fracasos nos intentos de crear unha educación institucional dun novo ser humano, lévano a dirixir os seus esforzos á educación familiar.
En 1837 crea en Blakenburg o Instituto para nenos pequenos que en 1840 pasa a denominarse Kindergarten (Xardín de infancia).
En 1851 son prohibidos os Kindergarten despois de ter unha grande expansión por todo o mundo, un ano máis tarde Fröbel morre en Marienthal.

Os materiais de Fröbel

Posiblemente polo feito de ser o creador dos xardíns de infancia, Froebel tamén foi o creador dos primeiros materiais cunha finalidade especificamente didáctica. Os seus materiais para o traballo na escola infantil, vistos desde a perspectiva actual, son un pouco simples e rudimentarios, pero historicamente, marcaron un referente no deseño de material didáctico.
Fröbel denominou a estes materiais dons e o seu deseño baseábase no seus importantes coñecementos de cristalografía. Co seu emprego buscaba unha xustificación máis metafísica que estritamente didáctica.
Os dons son 6 grupos de figuras xeométricas coas que as crianzas poden desenvolver diferentes tipos de actividades: Movelas, facelas xirar, facer pequenas construcións, etc.
Os dons deseñados por Fröbel eran os seguintes:

• Primeiro. Que inclúe seis pelotas con soportes, cada unha delas dunha cor (vermello, azul, marelo. laranxa, verde e violeta).   
• Segundo. Inclúe unha esfera, un cubo e un cilindro.   
• Terceiro. Formado por un cubo desarmable en oito cubiños.   
• Cuarto. Que é un cubo desarmable en oito paralelepípedos.   
• Quinto. Un cubo desarmable en vintesete cubiños.   
• Sexto. Que é un cubo desarmable en vintesete pezas.

Cos materiais que deseñou pretendía que os nenos e nenas realizaran diferentes actividades manuais, como por exemplo o entrelazado e o pregado, o tecido, o recortado e o picado cos punzóns. Moitas destas actividades aínda seguen a realizarse nas actuais escolas infantís.
O material que aparece na imaxe chámase punzón e foi introducido no traballo da escola infantil por Fröbel, que ademais de crear os dons, tamén deseñou outros materiais para o emprego no seu Kindergarten
Para ampliar a información sobre estas primeiras persoas que crearon materiais para a escola infantil, pódese ler o libro: Sanchidrián Blanco, C, e Ruíz Berrio, J. (2010).: Historia y perspectiva actual de la educación infantil. Graó. Barcelona.